فيه مواقف من كتر ما بتتحكي قدامك عن طفولتك بتتخيلها حتى لو مش فاكرها.. وبتزود عليها شوية تفاصيل وتحفظها في ذاكرتك بكل التفاصيل دي
زمااان وانا عندي تقريبا سنة او يمكن اصغر من كده شوية.. يعني من زمااااااااااان اوي
كنت في البيت مع اخويا وخالتي وماما كانت في الشغل
اخويا اكبر مني بخمس سنين.. يعني ساعتها كان عنده 6 سنين يعني اولى ابتدائي.. كان بيحبني اوي ومش عايزني اعيط خالص
خالتي كانت في المطبخ وانا قعدت اعيط.. اخويا بكل براءة علشان عايز يخليني مش اعيط يعمل ايه.. يعمل ايه !!
قعد يدور على اي تيتينة علشان يحطهالي واسكت.. دور في الاوضة ملقهاش.. دخل دور في الاوضة التانية ملقاش برده بس لقى حاجة تانية.. لقى العروسة بتاعتي اللي لما كنت بتعيط بيحطولها التيتينة بتاعتها فتسكت (تيتينة العروسة دي عبارة عن حاجة بلاستيك رفيعة وطويلة لما بتتحط في العروسة بتدخل في فتحة رفيعة لحد ما تضغط على زرار جوه فتسكت.. طولها حوالي 10 سم تقريبا)
قام واخد التيتينة العبقرية بتاعت العروسة وجايلي علشان يحطهالي .. تخيلو بقى لو كان حط بتاعة طولها 10 سم في بوءي كان ايه اللي هيحصل؟ غالبا مكنتش هبقى موجودة دلوقتي بكتب الكلام ده
وهو جاي علشان يعمل كده ,الحمد لله الحمد لله ,خالتي افتكرتني وقالت تيجي تطمن عليا.. لحقته على آخر لحظة
فاكرة لحد دلوقتي مكاني على السرير.. شكل العروسة.. اخويا وملامحه وانا بعيط كانت عاملة ازاي.. خالتي وهي بتلحقني .. ماما وهي بتحضني اول ما رجعت بعد ما سمعت الحكاية دي.. وكل ده وانا محضرتش الموقف بذاكرتي بس رسمته كده
يمكن علشان كده طول عمري مكنتش بحب العرايس..

والغريبة اني بعد كل ده عادي يعني بحب اخويا ومكرهتوش ولا حاجة.. الواحد كان طيب اوي فعلاً

تعتقدوا لو حد بيحب حد وضره في حاجة مع انه مكنش قصده.. بالعكس كان قصده منها خير.. تعتقدو الحب اللي بينهم ده هيتأثر؟؟