زوري.. ااااااه يا زوري


المعروف عني دلوقتي ان ذاكرتي ضايعة ونص الاسماء بنساها وساعات بنسى انا شفت الناس دي فين قبل كده اساسا
بس بالرغم من كل ده كنت جبارة وانا صغيرة

من اكتر الحاجات اللي مازلت فاكراها عملية اللوز.. كنت تعبانة منها تقريبا من اول ما اتولدت وزوري على طول بيوجعني وكانو لازم يشيلوها .. شالوها من غير ما يخدوا اذني.. الناس دي كده ازااااي :(

عملت العملية دي وانا عندي سنتين ونص تقريبا ومع ذلك فاكرة التفاصيل ونفسي اروح ازور المستشفى دي علشان اتأكد من الشكل اللي في دماغي
دخلت المستشفى مع بابا وماما واعتقد خالتي.. كان فيه ريسيبش كبير .. جت طنط الممرضة علشان تاخدني اوضة العمليات اللي على اليمين.. قالتلي تيجي نتصور يا حبيبتي وانا بكل هبل وبراءة اتبسطت طبعا ورحت معاها
دخلت اوضة العمليات.. نيمتني ع السرير وجابت الماسك بتاع التخدير.. اول ما شفته لقيت حاجة سودة وكبيييييييييييرة قعدت اصرخ واعيط واخد نفس اكبر وانا بصرخ :D
فجأة لقيت نفسي في اوضة على الناحية الشمال.. محستش بحاجة بتاتاً ف النص.. الله اعلم خرفت وقلت حاجة وانا ف البنج ولا لا.. بس الواحد ايامها كان مضمون مكنش عنده كوارث ومصايب زي دلوقتي :D
احلى حاجة في الحوار ده كله اني طبعا اتروق عليا بعدها.. لعب وهدايا وحاجات حلوة.. ظبطوني الصراحة

لما بفتكر الموقف ده بقعد اقول يااااه الواحد كان طيب وغلبان اوي واي حد يقوله حاجة حلوة يصدقها
بس اكتشفت اني برده لسه طيبة وغلبانة واي حد بيقولي حاجة حلوة بصدقها.. مقدرتش افقد ثقتي بالناس لحد دلوقتي

حاجة وحشة اوي

تعليق وحيد قاعد لحد دلوقتي .

  1. maha miho يقول :

    واضح ان جملة تعالي نتصور دي جملة موحدة على المستشفيات المصرية :/
    لأ وعلى مر الأجيال كمان !!
    الحاجات دي لازم تخلص بعد الثورة :)

    بتهيألي اللوز كمان هتختلف بعد الثورة.. والطيابة والغُلب والثقة والله أعلم ^_^

    حمد لله ع السلامة....... ~_^

    *********************************

    مها ميهوووو

ضع تعليقك هنا و إلا .. !